Prezidan Donald Trump pral anonse, nan sware lendi 9 jiyè a, ki moun li chwazi pou tounen yon jij nan Kou Siprèm nan nan plas Jij Anthony Kennedy ki pral pran retrèt li nan fen mwa jiyè a. Nominasyon sa a a byen kapab pwovoke yon batay nan Sena a.
Obsèvatè yo prevwa yon lit san mèsi ant manm Repibliken ak manm Demokrat Sena a akoz moun Prezidan Trump pral chwazi pou yon pòs jij nan Kou Siprèm nan. Repibliken yo gen yon majorite tou mens nan Gran Kò a; men Demokrat yo fè sèman yo pare pou yo goumen kont nominasyon sa a.
Anvan Prezidan Trump anonse nominasyon an nan sware lendi 9 jiyè a, li pibliye sou kont Twitter li yon nòt kote li di: "Depi byen lontan ma p tande moun di desizyon ki pi enpòtwn yon Prezidan ka pran, se desizyon pou l nonmen yon manm Kou Siprèm nan." ((https://twitter.com/realDonaldTrump/status/1016294574417956869 …)).
Nan mesaj M. Trump mete chak semèn devan pèp la, li deklare: "Pi gwo responsablite m se chwazi yon manm Kou Siprèm nan ki va entèprete fidèlman konstitisyon amerikèn nan... yon moun ak bon referans akademik, ki fò entèlektyèlman, ki san paspouki e ki respekte lwa n yo ak konstitisyon nou an anpil.
Jedi pase, pandan M. Trump t ap mennen kanpay nan Eta Montana, li te eseye ankouraje enterè piblik la nan chwa l pral fè a. Li te di: "Jan n konn sa deja, gen yon plas vid nan Kou Siprèm nan. Lendi pwochen, si n swiv radyo/televizyon vè 9:00 PM, mwen panse nou pral kontan anpil lè n va konnen ki moun mwen chwazi."