Prezidan ameriken, Donald Trump, ap pase yon move moman politik akoz pwoblem yon kandida republiken pou yon pòs nan sena a. Non kandida sa a se Roy Moore ki tonbe anba anpil akizasyon deske li te komèt divès abu seksyèl e pami viktim li yo ta genyen jenn-fi ki potko menm gen 20 tan.
Prezidan Trump, ki mete yon mesaj devan peyi a nan jounen mèkredi 15 novanm 2017 la, pat di a klè si li pral fè menm jan ak anpil lidè repibliken kap fè presyon pou Moore kite kous la.
Akizasyon yo pale de movez konduit Roy Moore pou aksyon sa yo li te poze sa genyen 40 tan. Kandida a rejte ak tout fòs pawòl ki di li te montre movez konduit nan le pase, menm si li pa demanti akizasyon kòmkwa li te konn soti ak jenn-fi ki potko gen laj pou sa. Jiskaprezan, gen 6 fi ki pale an piblik pou yo di kandida Moore te komèt abi seksyèl sou yo.
Lidè pati repibliken an ap anvizaje mwayen pou yo jwenn yon konkiran a la dènyè minit pou yo voye an fas Moore ki resevwa anpil apèl pou l mete fen nan kanpay li; repibliken yo menm lanse lide pou minis jistis la, Jeff Sessions, bay demisyon n epi poze kandidati li ankò pou pòs senatè a ke li te okiep pandan 20 tan kòm palmantè Eta Alabama.