Depatman Deta anonse lap wete nan anbasad amerikèn nan nan Kiba tout manm pèsonèl diplomatik la ki pa esansyèl. Se yon fason pou otorite yo nan Washington reyaji aprè 21 diplomat ameriken ki an pòs nan La Avàn tonbe viktim sa yo konsidere kòm yon atak kont sante yo.
Nan jounen vandredi 29 septanm 2017 la, Sekretè Deta ameriken an, Rex Tillerson, fè yon deklarasyon kote li di:
“Lèzetazini ap kenbe relasyon diplomatik li ak Kiba; men li dwe bay sante ak sekirite diplomat li yo premye plas la.”
Nan menm deklarasyon an, chèf diplomasi amerikèn nan fè konnen toutotan gouvènman kiben an pa garanti sekirite diplomat ameriken ki nan La Avàn yo, Washington ap redui efektif pèsonal la nan chif esansyèl la sèlman, “yon fason pou limite o- maksimòm kantite diplomat ki ekspoze anba maladi a.”
Misye Tillerson fini pa di jiskaprezan Washington pa gen eksplikasyon pou atak ki fèt sou diplomat ameriken yo.