Sekretè defans ameriken an, Jim Mattis, fè yon vizit sanzatann nan peyi Qatar pou l rankontre ak Emir e minis defans Qatar la, nan pi gwo baz militè Lezetazini posede nan rejyon Mwayen Oryan an.
Mesye Mattis rive nan baz ayeryèn Al-Udeid jedi 28 septanm 2017 la, swa kèk jou selman apre dirijan peyi a, Sheik Tamim Bin Hamad Al-Tani, te lanse yon nouvo apèl pou l mande yon dyalòg san kondisyon pou mete fen nan kriz ki mete Qatar dozado ak 4 lòt eta arab yo.
Misye Al-Tani te lanse apèl sa a nan yon diskou li te prononse devan Asanble Jeneral Nasyon Zini an. Arabi Saoudite, Ejip, Bahrain ak Emira Arab Uni te koupe relasyon diplomatik yo ak Qatar nan mwa jen pase a poutèt sa yo konsidere kòm rapò sere-sere li genyen avek Iran plis swadizan apwi lap bay ekstremis kap opere nan rejyon an.