Accessibility links

Donald Trump Mande Lidè l’OTAN yo Bay Plis Kontribisyon pou Defans Oganizasyon an

  • Ekip Sèvis Kreyòl VOA

Prezidan Trump ki tap pale nan kaye-jeneral l'OTAN an nan vil Brisèl nan Bèljik pandan Sekretè Jeneral òganizasyon an, Jens Stoltenberg (agoch) tap koute. (Foto: AP Photo/Evan Vucci, 25 me 2017).

Prezidan ameriken an, Donald Trump, pran lapawòl devan lidè Oganizasyon Trete Atlantik Nò a (l'OTAN) pou l atire atansyon yo sou le fèt ke “yo pa depanse ase lajan pou defans òganizasyon an”; daprè li, dirijan eta-manm yo ta dwe fikse atansyon yo plis sou teworism. Misye Trump pale konsa pandan lap patisipe nan yon somè l'OTAN kap dewoule nan vil Brusèl, nan peyi La Beljik. Prezidan Etazini deklare:

“l'OTAN nou pral genyen nan lavni an dwe fikse atansyon li anpil sou zak teworis, imigrasyon avèk menas kap sòti bò kote Larisi e sou fwontyè lès ak sid òganizasyon an. Pwoblèm sekirite grav sa yo se menm rezon ki fè mwen pale yon fason kare e dirèk ak sekretè jeneral Stoltenberg e ak lidè eta-manm alyans la pou m di yo, “finalman, manm l'OTAN yo dwe pote kontribusyon yo kòmsadwa epi respekte obigasyon finansye yo.”

Lidè l'OTAN yo ki te reyini nan vil Brisèl, Bèljik, nan jounen jedi 25 me 2017 la.
Lidè l'OTAN yo ki te reyini nan vil Brisèl, Bèljik, nan jounen jedi 25 me 2017 la.

Dapre misye Trump, 23 sou 28 eta ki fòme l'OTAN yo pa peye valè kòb yo te dwe peye a, e se yon enjistis yo fè pèp ameriken an. Prezidan Trump ajoute:

Pandan 8 tan ki pase yo, Lèzetazini depanse pou defans l'OTAN plis lajan pase sa tout lòt manm yo mete ansanm depanse. Si chak eta-manm l'OTAN te depanse 2% sèlman nan PNB (pwodui nasyonal bri) yo pou defans ane pase a, nou tap genyen 119 milya dola an plis pou defans komen nou e pou rezèvis ki ta la pou defann òganizasyon an.”

Pi lwen Prezidan Trump eksprime kondanasyon li pou atak ki te fèt lendi 22 me 2017 la sou moun ki tap asiste yon konsè nan vil Mancheter, nan peyi Langletè.

“Asasen sa yo, ekstremis sa yo --kite m di sa: Se pèdan enbesil yo ye; wi, pèdan enbesil. Kèlkeswa kote yo egziste nan sosyete nou yo, se pou nou mete yo deyò epi pa janm kite yo retounen.”

Se premye patisipasyon Prezidan Trump nan yon somè l’OTAN.

XS
SM
MD
LG