Accessibility links

Etazini-Prezidansyèl: Hillary Clinton ak Donald Trump Kontinye Mennen Kanpay San Pran Souf

  • Ekip Sèvis Kreyòl VOA

Hillary Clinton (agoch) ak Donald Trump.

Ozetazini, pandan rete 4 jou pou eleksyon prezidansyèl yo dewoule, Prezidan Barack Obama montre li se youn nan patizan pi fawouch kandida Pati Demokrat la, Hillary Clinton, genyen. Pou yon 2èm jounen youn apre lòt, Misye Obama ale nan Eta Florid nan jounen jedi 3 novanm 2016 la pou l mennen kanpay pou ansyen Sekretè Deta li a ki, daprè Prezidan an, “se moun ki gen plis kalifikasyon pou dirije Lèzetazini.”

Prezidan Barack Obama ki tap voye patizan demokrat yo nan Inivèsite Entènasyonal Florid la, nan Miami, kote li pran lapawòl pandan plizyè minit nan jounen jedi 3 novanm 2016 la.
Prezidan Barack Obama ki tap voye patizan demokrat yo nan Inivèsite Entènasyonal Florid la, nan Miami, kote li pran lapawòl pandan plizyè minit nan jounen jedi 3 novanm 2016 la.

Nan yon diskou manch long lidè ameriken an fè nan vil Miami kote li mande elektè yo sòti an mas al vote pou Madan Clinton, li pase kandida Pati Repibliken an, Donald Trump, nan betiz. Devan yon gwo foul moun ki tap bat bravo e kote anpil nan yo tap ri, Misye obama deklare :

“Nap ri! Men, se pa jwe map jwe. Nèg sa a pa gen tanperaman pou l vin Prezidan Lèzetazini; pou l vin kòmandan an chèf lame nou an.”

Florid ak Kawolin di Nò se 2 Eta sou kòt atlantik Lèzetazini chak nan 2 kandida yo di li dwe ranpòte si li vle genyen eleksyon an ki pral dewoule madi 8 novanm nan. Prezidan Obama te kontinye ajoute:

“Si nou ranpòte Eta Florid, nap ranpòte eleksyon an tou...."

Anpil touris arab vizite vil Miami e se la ou jwenn youn nan pi gwo popilasyon ispanofòn Ozetazini. Arab ameriken yo ak moun ki gen orijin latino-ameriken kap viv nan peyi a pa renmen ditou langaj anti-imigran kandida repibiken an, Donald Trump. Pi ta nan jounen an, Prezidan Obama te mennen kanpay tou nan vil Jackson, nan pati nò Florid kote kandida repibliken an te anime yon meeting.

Hillary Clinton ki tap pale nan yon meeting nan Pitt Community College, nan vil Winterville, Kawolin di Nò, jedi 3 novanm 2016 la.
Hillary Clinton ki tap pale nan yon meeting nan Pitt Community College, nan vil Winterville, Kawolin di Nò, jedi 3 novanm 2016 la.

Misye Trump akize Madan Clinton deske li tranpe nan yon eskandal kriminèl lè li te itilize yon sistèm elektwonik prive pou l regle zafè ofisyèl gouvènman federal la pandan pasaj li nan tèt Depatman Deta a. Daprè Donald Trump, ki ensiste pou l di advèsè demokrat li a te mete sekirite nasyonal Lèzetazini an danje, “lajistis gen dwa pase plizyè lane ap mennen ankèt sou Hillary pou zak sa a.”

Donald Trump ki tap mennen kanpay nan Miami, Florid, mèkredi 2 novanm 2016 la.
Donald Trump ki tap mennen kanpay nan Miami, Florid, mèkredi 2 novanm 2016 la.

Anvan jou eleksyon an, kandida repibliken an gen plan pou l òganize divès meeting nan Eta Pennsilvani ak 2 nan Kawolin di Nò. Jedi Madan Trump, Melania, te pran lapawol nanyon meeting ki dewoule nan vil Filadelfi, nan Pennsilvani; se premye fwa li parèt an piblik depi patisipasyon li nan konvansyon nasyonal Pati Repibliken an nan mwa jiyè pase a.

Pandansetan, Hillary Clinton ap santre atansyon li tou sou Kawolin di Nò kote li gen pou l fè 2 lòt meeting anvan madi 8 novanm nan.

XS
SM
MD
LG