Accessibility links

Etazini-Prezidansyèl : Hillary Clinton Konsève yon Avans sou Donald Trump

  • Ekip Sèvis Kreyòl VOA

Etazini Politik/Kanpay Elektoral 2016

Kandida Pati Demokerat la, Hillary Clinton, ak kandida Pati Repibliken an, Donald Trump, patisipe, pandan jounen madi premye novanm 2016 la, nan meeting ki dewoule nan kèk Eta yo konsidere kòm “Eta-kle” pou eleksyon prezidansyèl madi 8 novanm nan. Madan Clinton pase nan 3 vil nan Florid, yon Eta Misye Trump di li dwe ranpòte kan menm si li vle ranplase Prezidan Barack Obama nan La Mezon Blanch.

Donald Trump ki te pran lapawòl nan yon meeting nan Eta Florid nan jounen lendi 31 oktòb 2016 la.
Donald Trump ki te pran lapawòl nan yon meeting nan Eta Florid nan jounen lendi 31 oktòb 2016 la.

Dapre divès sondaj ki fèk fèt, kandida repibliken an genyen yon avans 1% sou Hillary Clinton nan Florid; sepandan li tèlman difisil pou prevwa kijan sa pral pase nan Eta sa a, yo tou lè 2 ap mennen kanpay “non stop” laba a yon semèn anvan eleksyon an. Donald Trump te genyen pou l vizite nan menm jounen madi a 2 lòt eta enpòtan pou eleksyon an: Pennsilvani, nan pati lès peyi a, ak Wisconsin, nan pati nòdwès Lèzetazini. Lap kite Wisconsin mèkredi a pou l retounen nan Florid.

Enpòtans Kolèj Elektoral la

Hillary Clinton nan Eta Florid nan jounen madi premye novanm 2016 la.
Hillary Clinton nan Eta Florid nan jounen madi premye novanm 2016 la.

Majorite sondaj ki fèt atravè tout peyi a kotinye montre, an gwo, Madan Clinton genyen yon avans sou Donald Trump; kidonk, kandida Pati Demokrat la kontinye konsève chans li pou l tounen premye fanm ki okipe La Mezon Blanch. Avantaj jeneral Madan Clinton sou Misye Trump se anviwon ant 2% ak 4% sou plan nasyonal la. Sepandan, sa k deside rezilta final eleksyon prezidansyèl yo Ozetazini, se pa vòt popilè yo; men pito rezilta kandida yo anrejistre nan chak eta separeman ak nan kapital federal la, Washington DC; ansuit, kandida ki devan nan chak eta se li ki ranpòte tout vwa eta sa a nèt.

Otorite yo nan komisyon elektoral la baze yo sou rezilta sa yo pou yo deside kilès ki ranpòte 270 vòt sou 538 ki genyen nan yon gran kò ki rele Kolèj Elektoral. Malgre ti avans Hillary Clinton genyen nan sondaj politik yo, analis yo prevwa li genyen yon gwo avans deja nan Kolèj Elektoral la.

XS
SM
MD
LG