Accessibility links

Etazini-Diplomasi: Kiba Pral Resevwa Prezidan Obama 21 ak 22 Mas 2016

  • Ekip Sèvis Kreyòl VOA

Lè prezidan Lèzetazini an, Barack Obama, va vizite Kiba nan mwa mas kap vini la a, li pral tounen premye lidè ameriken an fonksyon ki ale La Avàn nan preske 90 zan

San di pètèt, Misye Obama pral jwenn bèl konpliman ak ankourajman nan men Kiben ki kontan wè Lèzetazini retabli relasyon li avèk peyi yo. Sepandan, kèk lòt pa kontan paske, daprè yo, vwayaj sa a kapab vle di Lèzetazini ap pote lejitimite bay gouvènman kominis kap dirije peyi karayib la.

Prezidan Raul Castro (agoch) ak Prezidan Barack Obama
Prezidan Raul Castro (agoch) ak Prezidan Barack Obama

Misye Obama pwomèt pou l soulve kesyon dwamoun yo ak lòt pwoblèm ki poze nan Kiba lè li va rankontre ak prezidan kiben an, Raul Castro, pandan vizit 48 tè sa a ki pral dewoule le 21 ak 22 mas 2016 la. Konseye La Mezon Blanch pou kesyon sekirite nasyonal, Ben Rhodes, ki tap pale de vwayaj la nan yon rankont ak laprès nan jounen jedi 18 fevriye a, fè deklarasyon sa a:

“Nou konsidere vizit sa a kòm yon mwayen pou nou avanse sou wout nòmalizasyon rapò 2 peyi yo. Nap eseye fè yon pi gwo ouvèti vizavi Kiba nan domèn komèsyal la; men an menm tan tou, nap apiye epi defann prensip ki chè pou nou yo.”

Misye Rhodes ensiste pou l di Prezidan Obama pral soulve ak lidè kiben yo kesyon anprizonnman sitwayen peyi a kap eseye tou senpleman egzèse dwa de baz yo, ak pèsekisyon militan sa yo ap sibi anba men otorite yo.

XS
SM
MD
LG