Ann Ayiti, Premye Minis Laurent Lamothe demisyone ann akò ak rekòmandasyon Komisyon Konsiltatif Prezidansyèl la te fè prezidan Michel Martelly. Nan mesaj ki anonse demisyon an, Misye Lamothe deklare li kite pozisyon an “ak santiman li ankonpli misyon n.”
Prezidan Michel Martelly aksepte demisyon ansyen chèf gouvènman an, toujou nan kad miz an aplikasyon rekòmandasyon komisyon an. Chèf deta a, ki te pran lapawòl vandredi 12 desanm nan, fè konpliman pou travay ansyen Premye Minis la reyalize pandan plis ke 2an li pase ap dirije gouvènman an.
Reyaksyon apre demisyon Premye Minis Lamothe la
Youn nan pòtpawòl Mouvman Patriyotik Opozisyon Demokratik la (MOPOD), ansyen Depite Serge Jean Louis, deklare demisyon ansyen Premye Minis la pa fè lidè MOPOD yo ni cho ni frèt. Misye Jean Louis ajoute seri manifestasyon opozisyon an lanse yo pral kontinye jiskaske Prezidan Martelly demisyone tou.
Anfen, Depatman Deta ameriken fè konnen se ak satisfaksyon li resevwa rapò Komisyon Konsiltatif la fè prezidan Martellyy sou fason pou kriz la jwenn yon solisyon. Pòtpawòl depatman an, Jen Psaki, di Lèzetazini apiye efò k ap fèt pou eleksyon dewoule nan peyi a.