Accessibility links

Ayiti-Eleksyon/Pozisyon Ansyen Senatè G. Fortuné aprè yon Rankont ak Prezidan Martelly

  • Ekip Sèvis Kreyòl VOA

Jean Gabriel Fortune-1

Prezidan Michel Martelly rankontre, nan jounen mèkredi 12 novanm 2014 la, 2 lidè opozisyon an: Charles Henry Backer, dirijan pati politik RESPÈ, ak ansyen Senatè Jean Gabriel Fortune (Depatman Sid) k ap dirije Ligue Dessalinienne pour le Progrès. Misye Baker mande lidè ayisyen an fè aplike Atik 289 konstitisyon an pou fòmasyon yon nouvo konsèy elektoral pwovizwa; konsa KEP a ta gen ladan n reprezantan 9 sektè nan sosyete a olye de reprezantan 3 pouvwa yo.

Bò kote pa l, ansyen senatè Sid la, Jean Gabriel Fortuné, mete devan Prezidan Martelly pwopozisyon sa yo: 1.- Fòmasyon yon lòt gouvènman ak yon nouvo Konsèy Elektoral Pwovizwa; 2. Konvokasyon yon asanble konstitiyant pou ekri yon lòt konstitisyon; 3. Fòmasyon yon komisyon pou travay ak aktè konsène yo sou rechèch yon solisyon pou kriz politik la avan 12 janvye 2015.

Prezidan Martelly te rankontre tou ak yon delegasyon òm dafè ki fè l konnen kè sote yo pou kriz politik la pa anpeche etranje vin envesti e kreye travay nan peyi a. Sektè dafè a mande prezidan an fè tout sa li kapab pou l jwenn yon antant ak opozisyon an pou debloke kriz la.

Prezidan Martelly, ki di li satisfè ak rankont li fè nan jounen mèkredi 12 novanm nan, fè konnen seri konsiltasyon yo ap fini 18 Novanm pwochen; answit li pral fè yon rezime rekòmandasyon klas politik la ak sosyete sivil la mete devan l sou fason yo kwè kriz la kapab rezoud, avan li mete yon mesaj devan pèp la.

Yon lòt kote, lapli kap tonbe depi plizyè jou ann Ayiti pwovoke inondasyon ak anpil dega nan depatman sa yo: Wès, Nòdwès, Nòdès, Nò, Nip ak Gran Sid la. Nan Depatman Nòdwès la, inondasyon detwi ou byen domaje plizyè santèn kay. Otorite lokal yo mande asistans pouvwa santral la pou yo kapab pote èd bay sinistre yo.

Yon lòt kote, Jounalis Gerdy Jérémie, k ap travay pou Radyo-Televizyon Express Kontinantal, afilye Sèvis Kreyòl la nan Jakmèl, depoze plent kont 2 polisye ki, daprè li, te britalize l nan moman li t ap kouvri yon manifestasyon.

Anfen, konseye Depatman Deta Lèzetazni pou Amerik Latin ak Karayib la, Thomas Shannon, rekonèt dwa gason makòmè ak medam monkonpè ayisyen yo. Misye Shannon pale de apui li pou kominote sa a pandan ouvèti 3èm konferans Depatman Deta a sou Dwamoun ak efò kap fèt pou plis Rekonesans pou Gason Makòmè, Fanm Monkonpè, Moun ki an Afè ak Moun tou lè 2 Sèks, ak Moun ki Chanje Sèks. Konferans sa a kòmanse nan Washington mèkredi 12 novanm nan e li pral pran fen vandredi 14 Novanm nan. Diplomat la fè konpliman pou militan ayisyen Steve Laguerre, responsab òganizasyon SerOvie, ki te lanse yon mouvman ann Ayiti pou asiste kominote gason-makomè ak medam-monkonpè yo apre tranblemanntè 12 janvye 2010 la.

XS
SM
MD
LG