Accessibility links

Breaking News

Prezidan Michel Martelly Rekòmanse Kontak yo ak Klas Politik la


Prezidan Michel Martelly (Foto achiv)
Prezidan Michel Martelly (Foto achiv)

Prezidan Michel Martelly rekòmanse yon seri konsiltasyon ak klas politik la madi 30 septanm 2014 la nan Palè Nasyonal kote li rankontre delegasyon ki te sòti nan Relijyon pou Lapè, Konsèy Nasyonal Sant Demokratik (CONACED), ak Konferans Episkopal la; 7 manm sena ayisyen an te prezan tou nan rankont sa a (gwoup palmantè sa a pat genyen menm youn nan 6 senatè ki poko dakò pou yo patisipe nan yon vòt sou amandman lwa elektoral la). Prezidan Martelly manifeste entansyon pou l rankontre ak senatè sa yo vandredi 3 oktòb 2014 la nenpòt kote yo chwazi.

Avoka Osner Fevry, dirijan Konsèy Nasyonal Sant Demokratik la, di li bay lidè ayisyen an konsèy pou l evite yon sitiyasyon kote etranje ta oblije patisipe nan rechèch yon solisyon pou kriz la e pou palman an rete an plas apre desanm 2014 ann atandan dewoulman eleksyon yo.

Nouvèl Ayiti -mèkredi 1 oktòb 2014
please wait

No media source currently available

0:00 0:12:25 0:00
Direct link

Yon lòt kote, Avoka Michel Brunache, pòtpawòl Premye Minis Laurent Lamothe, konfime anonse kèk otorite wo-plase nan gouvènman an te fè pou di pap gen eleksyon ann Ayiti pandan ane 2014 la. Selon Misye Brunache, eleksyon pou chwazi manm palman an ak lidè kolektivite teritoryal yo kapab dewoule pandan 3 premye mwa ane 2015 la epi prezidansyèl yo nan mwa d oktòb menm ane a. Sou bò pa l, konseye elektoral Nehemie Joseph di Lavwadlamerik KEP a ap enstale manm Biwo Elektoral Depatmantal yo (BED) ak Biwo Elektoral Kominal yo (BEC) ann atandan konsèy la fikse dat eleksyon yo.

Madi 30 septanm nan, lapolis te sèvi ak gaz lakrimojèn pou l gaye militan Pati Fanmi Lavalas ki tap manifeste pou make 23èm anivèsè koudeta militè ki te ranvèse gouvènman Prezidan Jean Bertrand Aristide la an 1991. Fòs de lòd yo te pase a l'aksyon nan moman militan Lavalas yo tap mete tèt nan direksyon rezidans prive Misye Aristide nan zòn Tabarre, yon banlye nan kapital la, Pòtoprens. Nap raple lidè Fanmi Lavalas la nan pwoblèm ak lajistis jounen jodi a.

Anfen, Premye Minis Laurent Lamothe prezante yon bilan sou diferan rankont li te fè nan New York kote li te ale pou l asiste 69èm Asanble Jeneral Nasyonzini an. Chèf gouvènman an di objektif rankont sa yo sete ankouraje yon seri antrepriz etranje al envesti e kreye travay nan peyi d Ayiti.

XS
SM
MD
LG