Accessibility links

Sekretè Jeneral l’ONU Ban Ki-moon Mande Lapè nan Ikrèn

  • Ekip Sèvis Kreyòl VOA

Minis Afè Etranjè alman an, Frank-Walter Steinmeier (agoch) ak Premye Minis ikrenyen an, Arseniy Yatsenyuk. pandan yo tap pale ak laprès nan vil kyèv, Ikrèn lendi 13 me 2014 la.
Minis afè etranjè Lalmay la, Frank-Walter Steinmeir, ap vizite Ikrèn pou l fasilite yon dyalòg ant gouvènman an nan Kyèv ak separatis ki nan pati lès peyi a kote 2 pwovens, Donetsk ak Lohansk, òganize yon referendum dimanch 11 me 20114 la pou yo kite Ikrèn epi al fè pati tèritwa ris la. Anfèt, aprè òganizatè yo fin anonse rezilta yo montre majorite elektè yo te vote « wi », 2 pwovens yo deja deklare endepandans yo vizavi Kyèv. Lidè mouvman separatis la nan Donètsk, Denis Pushilin, fè konnen kounyela a pwovens la rele Repiblik Popilè Donetsk e jounen jodi a li se yon eta endepandan e souvren.

«Lè nou baze nou sou volonte pèp Repiblik Popilè Donetsk la, kap chache retabli yon jistis istorik, nou mande federasyon Larisi a pou l anvizaje yon reyinyon ant Repiblik Popilè Donetsk la ak Federasyon Larisi a. »

Daprè òganizatè referrndum nan, 90 pousan popilasyon nan 2 pwovens yo vote dimanch pou di yo vle kite Ikrèn pou yo al fè pati Larisi. Okenn sous endepandan poko verifye nouvèl sa a. Minis afè etranjè Ikrenyen an pale pou l di sete yon referendum fo mamit e, daprè li, sondaj dopinyon ajans oksidantal yo ak biwo leta nan Ikrèn òganize, montre pi fò popilasyon nan pati lès peyi a ta pi renmen wè nasyon an rete ini.
Bò kote pa l, Sekretè Jeneral Oganizasyon Nasyon Zini an, Ban Ki-moon, lanse apèl pou l mande yon fen nan mouvman ki sou pye pou divize teritwa ikrenyen an. Misye Ban di:

“Mwen lanse apèl bay tout sila yo kap chache minen inite Ikrèn, entegrite teritoryal ak stablite peyi a, mwen mande yo prese mete fen imedyatman nan aksyon sa a. Otorite yo nan Kyèv ta dwe kontinye itilize yon retni maksimòm pou yo reyaji devan aksyon sa yo; yo ta dwe rete nan kad lwa peyi a ak prensip entènasyonal ki gide respè dwamoun.”

Lèzetazini ak alye ewopeyen li yo fè konnen yo pa rekonèt rezilta referendum nan. Pòtpawòl Mezon Blanch la, Jay Carney, fè konnen Washington desi anpil poutèt Moskou pat sèvi ak enfliyans li pou l anpeche vòt la dewoule, aprè Prezidan Vladimir Putin te lanse yon apèl pou l mande separatis yo kite mouvman yo a tonbe.
XS
SM
MD
LG