Accessibility links

Politik nan Ikrèn - Peyi a gen yon Nouvo Lidè : Prezidan Palman an, Oleksander Turchynov.

  • Ekip Sèvis Kreyòl VOA

Prezidan palman an, Oleksander Turchynov, ki fèk monte nan pòs prezidan pwovizwa a nan Ikrèn (Foto: Dimanch 22 fevriye 2014).
Nan peyi Ikrèn, yon gwo manm opozisyon an, prezidan palman an, Oleksander Turchynov, monte nan pòs prezidan pwovizwa a nan fen jounen dimanch 23 fevriye 2014 la, mwens pase 24 trè aprè anyen lidè peyi a, Viktor Yanukovych, te pèdi pouvwa a sou desizyon palman an. Misye Turchynov, ki gen lontan depi li se yon bon zanmi lidè opozisyon an, ansyen premye minis Yulia Yimoshenko, monte nan pòs la aprè yon vòt ki dewoule nan menm jounen dimanch la nan palman an.

Madam Timoshenko –ki te sòti nan prizon samdi-- fè konnen yo te ofri l plas prezidan an; men li pa aksepte. Pandansetan, jous nan kòmansman jounen lendi a moun potko konnen ki kote ansyen prezidan Yanucovych ye, aprè li te kite kapital la, Kyèv, pou l ale nan pati lès Ikrèn kote li gen pi fò patizan politik li yo. Youn nan lidè opozisyon an, Vitali Klitschko, fè konnen prezidan dechouke a fèt pou l reponn devan lajistis pou tout vyolans ki te dewoule nan semèn ki pase yo e ki te fè anpil san koule nan peyi a.
---------------------------------------------------
Reyaksyon sou sitiyasyon kap devlope nan peyi Ikrèn nan

Minis Trezò (Ekonomi) Lèzetazini an, Jack Lew, deklare Washington pare pou l travay ak Larisi e ak lòt peyi pou yo pèmèt demokrasi retounen nan Ikèn epi retabli ekonomi peyi sa a ki nan yon move eta. Misye Lew fè yon rankont sou dosye ikrenyen an dimanch avèk kòlèg ris li a, Anton Siluanov, pandan yap patisipe nan somè Group G-20 an kap dewoule nan vil Sydney ann Ostrali.

Lèzetazini byen akeyi evolisyon sitiyasyon nan Ikrèn. Nan yon deklarasyon biwo de près Prezidan Barack Obama a fè parèt dimanch, li di:
“Otorite ameriken yo kontinye lanse apèl pou yo mande tout pati konsène yo nan Ikrèn prese mete fen nan vyolans la. Lèzetazini pral kontinye santre atansyon li sou yon dyalòg pasifik e demokratik pou estabilize sitiyasyon an, an kowoperasyon avèk alye li yo, Larisi, òganizasyon ewopeyen ak entènasyonal yo.”

Finalman, chèf politik etranjè Inyon Ewòp la, Catherine Ashton, prale lendi nan Ikrèn pou li rankontre avèk nouvo lidè pwovizwa yo ki swete tabli relasyon pi sere avèk inyon an.
XS
SM
MD
LG