Accessibility links

2èm Jounen 2èm Round Chita-Tande Entè-Siryen nan Vil Jenèv, an Swis

  • J. Lyonel Desmarattes

Louay Safi, pòtpawòl Kowalisyon Nasyonal Siryen an ap pale ak laprès apre yon rankont nan Jenèv kote Konferans sou Siri a ap dewoule, nan katye jeneral Nasyon Zini an ann Ewòp. (Foto : 10 fevriye 2014).
Nan vil Jenèv, nan peyi Laswis, 2èm round negosyasyon ant gouvènman Prezidan Bashar al-Assad la ak opozisyon-an, rive sou 2èm jounen li madi 11 fevriye 2014 la. Chita-tande sa yo ap dewoule an prezans anvwaye l’ONU/Lig Arab la, Lakhdar Brahimi, kap sèvi kòm medyatè. Pou 2èm faz kontak enter-siryen sa yo, Misye Brahimi ap eseye wè si 2 pati yo ta fè negosyasyon pou mete fen nan yon gè sivil ki la depi preske 3 zan epi pare chemen an pou fòmasyon yon gouvènman tranzisyon.

Lendi 10 fevriye a, Misye Brahimi te fè kèk rankont separe ak reprezantan 2 kan yo. Premye round negosyasyon yo te fini mwa pase a pratikman san okenn pwogrè. Pandansetan, responsab oganizasyon imantè yo kontinye fè efò pou yo pote sekou bay sivil ki rete bloke nan vil Homs kote lagè a pa sispann fè ravaj.

Aprè rankont lendi yo, gouvènman Assad la ak konbatan rebèl yo te mete yo dakò pou yo kite asistans imanitè antre nan vil Homs; peryòd yo fikse pou sa ap pran fen mèkredi. Konsa, Nasyon Zini espere plis pwovizyon pral kapab rive nan zòn nan epi plis sivil ap pwofite pou yo kite vil la.

Depi jedi pase a, plis pase 800 sivil jwenn mwayen kite rejyon ki anba men rebèl yo. Nouvèl la raple depi 2011 -ane kote mouvman leve-kanpe a te kòmanse kont rejyon Assad-la- plis pase 130 mil moun pèdi lavi yo e gen 9 milyon lòt ki oblije kouri kite zòn kote yo ap viv la, lè yo pa kouri kite peyi Siri li menm.
XS
SM
MD
LG