Accessibility links

Eksplozyon nan Bewout, kapital Liban. Bilan: Omwen 5 Mò

  • J. Lyonel Desmarattes

Ponpye libanè ap etenn dife ki pran nan machin ki te estasyone nan anplasman kote eksplozyon an fèt la nan Bewout. (Foto: Vandredi 27 desanm 2013).
O Liban, daprè deklarasyon otorite yo fè, yon machin pyeje eksploze nan mitan capital la, Bewout, kote ansyen minis finans Mohamad Chatah ak 4 lòt moun pou pi piti pèdi lavi yo.

Misye Chatah sete youn nan prensipal pwòch kolaboratè ansyen Premye Minis Saad Hariri. Anvan sa, li te sèvi kòm anbasadè libanè nan kapital Lèzetazini an, Washington DC. Eksplozyon machin pyeje a –ki fèt byen bonè vandredi 27 desanm 2013 la- blese plizyè douzèn lòt moun. Youn nan yo se Abdala Safwan, ki bay temwayaj sou sa eksplozyon an fè nan biwo kote li tap travay la. Misye Safwan di:

« Mwen te nan biwo mwen nan 2èm etaj la lè eksplozyon an fèt la. Fòs detonasyon an te tèlman gwo nèg, nou tout sòt tonbe atè. Se yon gwo kokenn eksplozyon e, jous kote m te ye a, mwen jwenn mwayen blese ni nan men, ni nan tèt. »

Jous nan mitan jounen vandredi a nan Bewout, pèsonn moun ni gwoup moun potko pran responsablite pou ekspozyon an ki fèt tou prè palè dè ministè a kote gouvènman an genyen biwo santral li. Sepandan, nouvèl la di ansyen minis finans ki mouri a, Mohamad Chatah, se yon nèg ki pat konn mete dlo nan bouch li pou l kritike prezidan yon peyi vwazen, Siri, an palan de Bashar al-Assad. Nan dènye mesaj li te poste sou kont twitter li anvan eksplozyon te fèt, li te kritike seryezman yon gwoup militan libanè, Hezbollah, poutèt li apiye Prezidan Assad nan lagè sivil kap dewoule nan Siri a.
XS
SM
MD
LG