Accessibility links

Mesaj « Urbi et Orbi » Pap Franswa – Priyè pou Lapè nan Soudan Sid

  • J. Lyonel Desmarattes

Pap Franswa ap prezante mesaj "Urbi et Orbi" li a (pou Vil la e pou Lemond) pandan li te sou balkon santral Bazilik Sen Pyè a nan Vatikan (Foto: 25 desanm 2013).
Kretyen toupatou nan lemond ap selebre, mèkredi 25 desanm 2013 la, jou relijye ki pi sen pou yo pandan ane a, ki se jou anivèsè nesans Jezi –oubyen Nwèl. Nan okazyon an, Pap Franswa egzòte yon milya 200 milyon katolik ki genyen nan lemond antye pou yo rejwi yo pandan fèt sa a, paske « Jezi se limyè kap briye nan fènwa e kap pote lapè. » Souvren Pontif la di:

« Nan istwa pèsonèl pa nou, genyen an menm tan bon moman ak moman difisil; genyen limyè ak fènwa. Si nou renmen Bondye, si nou renmen frè ak sè nou yo, nap mache nan limyè ; men si nou fèmen kè nou, si nou fè kè nou di pou n pa wè pwoblèm frè ak sè nou yo ; si nou kite ògèy, twonpri, desepsyon ak egoyism domine nou, lè sa a se fènwa kap tonbe sou nou e kap anvayi anviwonman nou. »

Chèf legliz katolik la pale konsa nan premye omeli li prezante kòm pap pandan yon mès ki dewoule lavèy Nwèl la nan Bazilik Sen Pyè a nan Vatikan. Li te santre omeli a sou vwayaj istorik e pèsonèl lèzòm ap fè pou yo antre nan "la terre promise", pou yo sove nanm yo epi -nap site pap la, "pou yo devlope lakay yo lespri moun kap fè efò pou yo wè grant limyè a."

Pandansetan plizyè milye pèlren kretyen desann nan lari vil Betleyèm, nan Si-Jòdani, kote yo defile apye pou yo ale sou Plas Krèch la, andeyò Legliz Nativite a, jisteman nan anplasman kote, daprè kretyen yo, Lavyèj Mari te akouche Jezi. Anndan Legliz la menm, Fuad Twal, patriyach laten Jerizalèm nan, te selebre mès minui an an prezidans prezidan Pouvwa Palestinyen an, Mahmoud Abbas, ak responsab an chèf politik afè etranjè Inyon Ewòp la, Catherine Ashton.

Toujou nan kad selebreasyon Nwel la, nan vil Bagdad, kapital Irak, fanmi kretyèn yo pwofite yon ti kalmi nan zak vyolans yo ak gwo mezi sekirite otorite yo tabli nan okazyon an pou yo asiste yon sèvis relijye ki dewoule lavèy jou Nwèl la nan Legliz Mar Youssef la.

Ozetazini, Prezidan Barack Obama fè pase nan radyo e sou entènèt la yon mesaj kote li fè konpliman pou manm fòs zame Lèzetazini yo ak tout manm fanmi yo, pou sèvis yo e pou sakrifis yo fè pou peyi a. Misye Obama atire atansyon sou lefèt ke, nan moman lagè Irak la ak lagè Afganistan an fini, gen mwens sòlda ameriken ki ekspoze anba zam lennmi pase nan tout lòt epòk pandan 10 zan ki pase yo. Lidè ameriken an te anrejistre mesaj sa a depi vandredi pase a, anvan li te ale nan Eta Awayi, kote li te pran nesans e kote lap pase 2 semèn vakans ak fanmi li.
XS
SM
MD
LG