Accessibility links

Daprè Nasyon Zini, 400 moun mouri e 800 lòt blese nan Soudan-Sid.

  • Ekip Sèvis Kreyòl VOA

Pèsonèl medikal Misyon Mentyen Lapè l'ONU nan Repiblik Soudan Sid (UNMISS) ap ede sivil ki nan yon lopital medsen kanbodyen ap dirije nan Jouba (Foto UNMISS, 18 desanm 2013)
Nan peyi Soudan Sid, lopital yo di Nasyonzini plizyè jou batay ki dewoule nan kapital la, Jouba, touye omwen 400 moun e blese 800 lòt. Chèf Fòs Mentyen lapè Nasyonzini nan Soudan Sid la, Hervé Ladsous, bay chif sa yo madi 17 desanm 2013 la, nan yon rapò li mete devan Konsèy Sekirite l’ONU an; men li di li pat kapab verifye kantite mò ak blese yo.

Nan yon deklarasyon ki parèt byen ta nan jounen madi a, Konsèy Sekirite a di li gen kè-sote devan posiblite pou sèten gwoup moun sibi vyolans nan peyi a e li lanse apèl bay gouvènman sid-soudanè a pou mande l fè chita-pale avèk advèsè li yo.

Sekretè Deta ameriken an, John Kerry, ki tap abòde dosye a mèkredi 18 desanm nan, fè konnen pèp sid-soudanè a fè twòp sakrifis deja pou peyi a ta retonbe nan vyolans ankò. Chef diplomasi amerikèn nan deklare :

« Se mwayen pasifik e demokratik ki pou rezoud mezantant politik yo; pèp la goumen anpil pou sa. Gouvènman an dwe respekte prensip eta-de-dwa a e pèp sid-soudanè a dwe an mezi pou l reyalize tout potansyèl li nan lapè. »

Batay yo te kòmanse dimanch 15 desanm nan avek sa Prezidan Salva Kiir konsidere kòm yon tantativ koudeta; daprè Misye Kiir, moun ki te monte koudeta sa a se fòs ki fidèl anvè ansyen vis-prezidan Riek Machar ke li te revoke nan mwa jiyè pase a. Kout zam te kontinye tire pasi-pala lendi ak madi nan Jouba.
XS
SM
MD
LG