Accessibility links

Breaking News

Afrik di Sid an Dèy akoz Lanmò Ansyen Prezidan Nelson Mandela


Yon gwoup moun kap pote yon foto ansyen lidè Afrik di Sid la, Nelson Mandela, ap chante e yap danse devan kay Mandela nan vil Johannesburg, apre lidè anti-apartheid la te mouri nan sware jedi 6 desanm 2013 la,.
Yon gwoup moun kap pote yon foto ansyen lidè Afrik di Sid la, Nelson Mandela, ap chante e yap danse devan kay Mandela nan vil Johannesburg, apre lidè anti-apartheid la te mouri nan sware jedi 6 desanm 2013 la,.
Li te preske 5 kè de laprè-midi --lè Washington, lè Pòtoprens-- jedi 5 desanm 2013 la, prezidan Afrik di Sid la, Jacob Zuma, anonse lanmò ewo nasyonal peyi a, Nelson Mandela, e sa pat pran lontan pou nouvèl la fè le tou di mond. Lavi Nelson Mandela dewoule sou plis pase 9 dizèn dane --donk plis pase 90 zan) e se li i te rive wete Afrik di Sid nan fènwa kote sistèm apartheid la te plonje li, pou l tounen peyi demokratik pliri-patis li reprezante jounen jodi a.

Nouvèl lanmò Nelson Mandela a pa reprezante yon sipriz tèlman. Lidè mouvman anti-apartheid la te pase yon bon tan ap antre-sòti lopital; doktè te pase yon bon tan ap fè ale-vini lakay li, e 95 zan li viv la, se yon veritab defi pou lanati, lè yon moun konsidere tout tribilasyon, tout stress ki te makònen ak egzistans li.

Tou dabò, Nelson Mandela te yon lidè trè aktif nan tèt yon mouvman revolisyonè gouvènmann rasis Afrik di Sid la te entèdi –an palan de Kongrè Nasyonal Afriken an (ANC). Se li ki tap dirije branch ame gwoup la, yon aksyon ki te lakoz otorite yo arete li e fèmen l nan prizon kote li ta pral pase 27 tan.

27 lane sa yo reprezante peryòd ki pi tèrib non sèlman nan lavi Nelson Mandela, men tou nan lavi tout peyi Afrik di Sid. Sepandan, kòm yon lidè karismatik, Mandela te jwenn mwayen konsève fèm volonte li, tout dispozisyon li e li te kontinye mennen batay la menm dèyè bawo prizon n nan. Li tap pral sòti an triyonf an 1990 pou l mete fen nan sistèm apartheid la epi, an 1994, li te ranpòte premye eleksyon demokratik, lib e onèt ki janm dewoule nan tout istwa Afrik di Sid.
XS
SM
MD
LG