Accessibility links

Breaking News

Koutje sou Katajèn, Kolonbi, Syèj 6èm Somè Dèzamerik la


6èm Somè Dèzamerik la
6èm Somè Dèzamerik la
Tout moun ki vizite Katejèn dakò pou di se yon vil ki chaje ak cham. Vizitè li yo, menmsi yo ale la yon sèl fwa, pa ka bliye karaktè womantik li, bote achitekti li ak yon richès kiltirèl ki fè vil sa a sanble ak yon mize an plennè. Se kèk nan rezon ki fè li tounen youn nan vil nan Amerik Latin nan moun chwazi pi souvan pou òganize konferans entènasyonal, rankont òmdafè epi fè vwayaj touristik.
Daprè dosye otorite kolonbyen yo kenbe sou evenman ki dewoule nan vil la, chak ane Katajèn sèvi kòm syèj pou plis pase 365 rankont antènasyonal -pami yo genyen kongrè, rankont-so-somè epi diferan lòt kalte reyinyon –sa ki ba ou preske yon rankont pa jou e ki mennen ant 200 mil a 350 mil vizitè chak ane. Pou byen di, preske 50 pou san tout evennman ki gen enpòtans nasyonal ou entènasyonal e ki dewoule nan Kolonbi, se nan Katajèn yo dewoule. Epi, dapre Chanm Komès Katajèn nan, aktivite konsa ki fèt nan vil la genyen 30 pou san plis chans pou yo reyisi pase si yo te dewoule yon lòt kote.
Kolonbyen yo rele li << la ciudad històrica>> ou <<vil istorik la>>, akoz tout vestij li genyen ki raple epòk kolonyal la epi se youn nan vil ki pi ansyen nan peyi a. Jounalis kolonbyèn Vanezza Vallejo, kap travay pou Artesanias de Colombia (yon pwogram gouvènmantal ki la pou devlope sektè atizanal la nan Kolonbi) di nou denye resansman an, ki te dewoule nan ane 2005, te montre Katajèn te genyen deja preske yon milyon kretyen vivan.
Karajèn posede 3 sant konvansyon, lye istorik tankou fò, fòtrès ak << la muralla>>, sètadi yon miray men wotè, men lajè, ki te antoure vil la nan epòk kolonyal la pou anpeche pirat piye pwopriyete abitan li yo –miray la kanpe debou toujou. Dapre biwo touristik vil la, vil la genyen yon enfrastrikti otelye ki ofri vizitè li yo (nasyonal ak etranje) yon afè de 3 mil 485 chanm ---pami otèl sa yo genyen ki se otèl de plaj, de veritab gratsyèl avèk balkon ki domine Oseyan Atlantik la (donk, Lanmè Karayib la). An plis tout bagay sa yo, pòl devlopman vil la ap chache wè kounyela a si Katajèn ta kapab atire pwofesyonèl ki jwe gòlf.
Pandan Katajèn se yon sant ki popilè kòm syèj evennman ki genyen gwo enpòtans, youn nan magazin ki ekri sou destinasyon touristik, Huffington Post, atire atansyon sou le fèt ke, pami tout vil ki genyen nan lemond, se li menm ki resevwa plis kòmantè nan Facebook. Anfen, chantè e mizisyen ayisyen Jean Claude Eugene, ki abitye vwayaje kòm fonksyonè yon gwo bank ki gen anpil enpòtans sou plan entènasyonal, fè konnen Katajèn se vil kote ou jwenn <<mujeres maravillosas>>, sètadi li atire atansyon sou le fèt ke, dapre li, nan Katajèn nou jwenn kèk nan pi bèl kreyati ki egziste sou planet la -nap pale de yon kreyati ki rele la femme.

J. Lyonel Desmarattes
Anvwaye espesyal
Sèvis Kreyòl Lavwadlamerik la
Katajèn, Kolonbi.
XS
SM
MD
LG