Accessibility links

Ejip - Vyolans : Arestasyon Lidè Pati Frè Mizilman yo

  • Ekip Sèvis Kreyòl VOA

Ann Ejip, otorite yo poze arestasyon lidè espirityèl Pati Frè Mizilman yo, Mohamed Badie, yon aksyon ki montre y ap pouse pou pi devan avèk operasyon sere-boulon yo lanse kont patizan prezidan dechouke a, Mohamed Morsi.

Misye Badie, ki genyen 70 zan, tonbe anba men lapolis byen bonè madi 20 out 2013 la nan yon katye ki nan pati lès vil Lekèr kote patizan Prezidan Morsi yo te pase plizyè semèn ap manifeste kont nouvo gouvènman pwovizwa a.

Mohamed Badie genyen pou l prezante nan tribinal nan dat 25 out pwochen ansanm avèk kèk lòt manm Pati Frè Mizilman an. Otorite yo akize yo deske yo te ankouraje pèp la komèt zak vyolans ki te koze lanmò moun devan katye jeneral pati a nan mwa jen pase a, kèk jou anvan lame te dechouke Prezidan Morsi.

Depi 3 jiyè 2013 la, chif ofisyèl pou kantite moun ki mouri yo depase mil. Sepandan, Pati Frè Mizilman yo fè konnen chif la plis lontan pase kantite otorite yo bay la.

Pandansetan, otorite lajistis yo byen kapab libere, anvan lontan, ansyen Prezidan Hosni Moubarak ki deja pase plis pase 2 zan nan prizon aprè yon mouvman leve-kanpe popilè ki te fin pa chavire rejim li a.

Lendi 10 out 2013 la, yon tribinal fè konnen lajistis pa kapab kontinye kenbe l nan prizon sou akizasyon deske li menm ak pitit-gason li yo te fè wout kwochi ak lajan ki te dwe sèvi pou fonksyonnman palè nasyonal la.

Malgre lòd tribinal la, Misye Moubarak rete nan prizon toujou pou l reponn lòt akizasyon kap peze sou do l. Avoka ansyen prezidan an deklare li espere kliyan li a pral jwenn liberasyon li anvan fen semèn sa a.
XS
SM
MD
LG