Accessibility links

Ejip/Vyolans: Pati Frè Mizilman Anonse Plis Manifestasyon Anti-Gouvènmantal

  • Ekip Sèvis Kreyòl VOA

Nan peyi Lejip, yon gwo pati nan sitwayen yo an dèy aprè lanmò plizyè santèn moun ki tonbe nan konfwontasyon ant fòs de lòd yo avèk patizan prezidan dechouke a, Mohamed Morsi. Manifestasyon pou e kont Misye Morsi pa sispann dewoule nan peyi depi lame te ranvèse, nan dat 3 jiyè pase a, premye prezidan ki eli nan listwa Lejip.

Chif gouvènman an bay pou kantite moun ki mouri yo se 638; men yon pati kap defann prezidan Morsi --Pati Frè Mizilman yo-- fè konnen se plizyè milye moun militè yo touye nan operasyon an ki te dewoule mèkredi 14 out pase a.

Otorite lapolis yo menase pou yo sèvi ak zam ankò pou yo pwoteje tèt yo kont manifestan anti-gouvènmantal yo ki anonse yo pap bay legen nan batay yo a. Pati Frè Muzulman yo sòti pou l defye otorite yo e li lanse apèl pou l mande pèp la pran lari pou yon gwo kokenn manifestasyon pou vandredi 16 out la, nan okazyon jounen lapriyè a, pou yo egzije retou Misye Morsi sou pouvwa a.

Prezidan fransè a, François Hollande, gen entansyon fè 2 kout-telefòn separe nan jounen vandredi a pou l pale avèk Premye Minis britanik la, David Cameron, e ak Chanselye peyi Lalmay la, Angela Merkel, pou yo abòde sitiyasyon an nan Lejip.

Otorite ejipsyen yo akize Pati Frè Mizilman yo ak patizan Prezidan Morsi yo deske yo komèt zak teworis ak sabotaj; bò kote pa yo, Frè Mizilman yo reponn pou yo di peyi a ap retounen anba yon tirani militè.
XS
SM
MD
LG