Accessibility links

Etazini/Larisi-Diplomasi: Rankont John Kerry avèk Sergei Lavrov

  • Ekip Sèvis Kreyòl VOA

Sekretè Deta John Kerry (agoch) avèk Minis Afè Etranjè Ris la, Sergei Lavrov (Foto achiv: 23 avril 2013).
Sekretè Deta ameriken an, John Kerry, ap rankontre vandredi 9 out 2013 la nan Washington avèk tokay ris li, Sergei Lavrov. Misye Kerry pral pwofite de rankont sa a pou l mande, yon fwa ankò, pou Larisi voye tounen Ozetazini fijitif ameriken Edward Snowden ki anba akizasyon deske li te pibliye detay sou operasyon sekrè gouvènman Lèzetazini an lanse pou l siveye aktivite sitwayen yo sou entènèt la ak konvèsasyon telefonik yo. Misye Kerry ak minis defans ameriken an, Chuck Hagel, pral fè chita-pale avèk Misye Lavrov e avèk minis defans ris la, Sergei Shoigu.

Pòtpawòl Mezon Blanch la, Jay Carney, fè konnen san di pètèt dosye Snowden nan pral nan mitan diskisyon yo. Desizyon Larisi pran pou l ofri Edward Snowden azil politik, se yon desizyon ki mete Lèzetazini an kòlè. Se youn nan mezantant ant 2 peyi yo ki lakoz Prezidan Barack Obama anile yon rankont li te gen pou l fè, mwa pwochen an nan Larisi, avèk Prezidan Vladimir Putin. Misye Carney te abòde dosye Snowden nan nan yon konferans-pou-laprès li te genyen jedi e li te reponn kesyon sou rezon-dèt desizyon Prezidan Obama a. Pòtpawòl la di:

“ Misye Snowden se yon faktè, men se pa sèl faktè a. Lè ou gen somè konsa, ou ta renmen wè pwogrè fèt nan relasyon nou anvan somè a dewoule… pwogrè ki enpòtan ase pou jistifye yon rankont ant 2 lidè yo.”

Jay Carney ajoute rankont wo-nivo kap dewoule vandredi a se yon prèv ki montre Lèzetazini dispoze kontinye pran kontak dirèk e aktif avèk Larisi sou divès dosye tankou Afganistan, Kore di Nò, Iran avèk efò ki dwe fèt pou òganize yon konferans entènasyonal sou lapè nan peyi Siri.
XS
SM
MD
LG