Accessibility links

Breaking News

Pap François Rive sou 2èm Jounen Vizit li Nan Peyi Brezil


Madi 23 jiyè 2013 la se 2èm jounen yon vwayaj yon semèn Pap François ap fè o Brezil kote souvren pontif la gen pou l pase yon semèn.
Madi 23 jiyè 2013 la se 2èm jounen yon vwayaj yon semèn Pap François ap fè o Brezil kote souvren pontif la gen pou l pase yon semèn.
O Brezil, plizyè milye fidèl katolik, ki tap chante chante legliz yo, swete Pap François « byen veni » nan fen jounen lendi 22 jiyè 2013 la, pandan li tap antre nan vil Rio de Janeiro kote li kòmanse yon vwayaj yon semèn nan peyi a.

Yon popilas moun tap danse e yo tap rele kou moun fou pandan Souvren Pontif la tap souri epi lonje men ba yo. Genyen nan fidèl yo ki te kouri nan lari yo pou yo te kapab swiv kòtèj papal la, pandan yon machin òdinè tap sikile ak Pap la atravè Rio.

Lè Pap François te fini fè yon toune nan vil la, li rankontre ak prezidan Brezil la, Madam Dilma Rousseff, nan yon seremoni kote prezidant la swete pap la « byen veni » ofisyèlman –seremoni ki dewoule nan palè gouvènmantal Guanabara a. Aprè sa, manifestan anti-gouvènmantal te tonbe nan lese-frape avèk lapolis andeyò palè a.

Daprè nouvèl jounalis ki te sou plas rapòte, sanble foul la tap manifeste kòlè li kont otorite brezilyen yo, e non pa kont pap la, li menm.

Nan youn nan seremoni ki sou pwogram vizit Souvren Pontif la, plis pase yon milyon jèn brezilyen gen pou rasanble nan vil Rio de Janeiro nan okazyon aktivite ki pral selebre Jounen Mondyal Jenès la jedi 25 jiyè a.

Pwogram nan prevwa tou yon rankont ak yon gwoup prizonye nan vil Rio, plis yon vizit nan yon bidonvil kote lapolis ak lame te lanse divès operasyon nan kòmansman ane 2013 la, pou yo te desitire trafikan dwòg.

Se konsa tou, pap la pral inogire yon paviyon pou tretman moun ki esklav dwòg nan yon lopital nan Rio, e li gen pou l priye nan yon chapèl ki pote non Notre Dame Aparecida, ki se Sent Patwòn Brezil.

Non souvren pontif la anvan li te vin pap se Jorge Mario Bergoglio ; li se yon ansyen kadinal peyi Ajantin. Li te tounen pap sou non François nan kòmansman ane 2013 la. Yon afè de 10 mil polisye mete sou plis pase 14 mil sòlda, twouve yo sou plas pou yo asire pwoteksyon chèf legliz katolik la pandan vizit sa a.
XS
SM
MD
LG