Accessibility links

Afrik di Sid: Ansyen Prezidan Nelson Mandela nan Aparèy Respiratwa

  • Ekip Sèvis Kreyòl VOA

Timoun lafanmi Mandela poze pou yon foto tou pre lopital vil Pretoria, nan Afrik di Sid, kote Nelson Mandela ap resevwa swen (27 jen 2013).
Prezidan sid-afriken an, Jacob Zuma, pran desisyon pou l rete nan peyi li e anile yon vizit li te gen pou l fè nan Mozambik, nan moman kondisyon sante ansyen Prezidan Nelson Mandela twouve l nan yon eta vrèman grav.

Daprè yon nòt ki sòti nan biwo Prezidan Zuma, lidè sid-afriken an te rann Misye Mandela yon vizit byen ta mèkredi 26 jen an, nan lopital kote lap resevwa swen medsen nan vil Pretoria.

Nòt la di doktè yo kontinye fè tout sa yo kapab pou yo wè si ansyen lidè mouvman anti-apartheid la ta rejwenn sante li. Dènye nouvèl yo fè konnen doktè deside itilize aparèy respiratwa pou yo ede Misye Mandela kontinye rete anvi toujou.

Yon gwoup moun ki t ap chante, ki tap priye pou mande Bondye pèmèt Misye Mandela rejwenn sante li, te reyini, nan fen jounen mèkredi a, devan lopital la kote yo te òganize yon retrèt-o-flanbo. Pawòl ki nan chante yo tap chante yo, fè konpliman e rann omaj pou Nelson Mandela ki genyen 94 zan.

Sa gen 3 semèn deja depi ansyen lidè mouvman anti-apartheid la twouve l lopital kote yo te mennen li akoz yon enfeksyon nan poumon ki pa vle kite li. Mizisyen, chantè e pawolye Machiel Roets di sa l panse de reyalizasyon ansyen prezidan sid-afriken an e pou kisa li menm ak lòt moun te òganize retrèt-o-flanbo a.

Misye Roets deklare:
“Nou rekonèt sa nonm sa a fè pou nou kòm yon peyi, dekwa pou n kapab fè lemond antye wè bagay yo kapab fèt nan peyi nou an ; se pou nou pwouve lemond nou kapab mete tèt nou ansanm e nou kapab viv ansanm tankou pitit yon sèl nasyon.”

Pandan retrèt o flanbo a t ap dewoule a, yon gwoup jenn te rasanble nan vilaj Kounou, nan pwovens Cape ki nan pati lès peyi a e kote Nelson Mandela te pran nesans, pou yo te chante e priyè pou malad la.

Depi kondisyon sante Misye Mandela te kòmanse deteryore nan lopital kote li ye depi 3 semèn déjà a, sitwayen sid-afriken ak sitwayen peyi toupatou nan lemond pa sispann eksprime apui yo pou li, epi fè konnen kè-sote yo genyen akoz gravite maladi ansyen lidè sid-afriken an.
XS
SM
MD
LG