Accessibility links

Toune yon Semèn Prezidan Barack Obama sou Kontinan Afriken an

  • Ekip Sèvis Kreyòl VOA

Prezidan ameriken an, Barack Obama, kite Washington, mèkredi 26 jen 2013 la, pou yo tounen sou kontinan afriken an kote li va vizite peyi Senegal, Tannzani ak Afrik di Sid. Se 2èm toune lidè ameriken an ann Afrik depi li te eli prezidan Lèzetazini an 2008. Nan chak peyi Misye Obama va vizite, li pral ensiste sou apui administrasyon l nan pou nasyon ki gen sistèm demokratik lakay yo e sou pwogrè ekonomik, epi li va pale de enpòtans respè dwamoun.

An 2009, Prezidan Oabam te pase mwens ke 24 trè nan rejyon ki anba Sahara a, avèk yon vizit li te fè nan Ghana, peyi kote papa l te pran nesans; anpil obsèvatè panse vizit sa a te twò kout. Nan okazyon premye toune a, lidè ameriken an te pran lapawòl devan palman ganeyen an kote li te abòde tèm tankou demokrasi, opòtinite ekonomik ak itilizasyon mwayen pasifik pou rezoud konfli.

Li te ensiste sou sa l te rele “verite fondamantal la”. Misye Obama te bay detay nan deklarasyon sa a :
"Devlopman depann de bon gouvènans. Se yon eleman, se yon faktè ki absan nan twòp peyi e depi twò lontan. Se chanjman sa a ki kapab debloke potansyèl kontinan afriken an."

Asistan-konseye sekirite nasyonal Mezon Blanch la, Ben Rhodes, di Misye Obama rekonèt le fèt ke li pa fè plis vizit an Afrik, sa reprezante yon desepsyon pou anpil moun; e li dispoze fè tout sa ki nesesè pou l chanje pèsepsyon sa a.

Misye Rhodes di :
"Lèzetazini ta renonse a plas li kòm lidè nan lemond si prezidan ameriken an pa ta tabli yon kontak aktif e solid avèk Lafrik. E se sa Misye Obama pral fè."

Premye etap toune afriken Prezidan Obama a se peyi Senegal kote li pral rankontre ak Prezidan Macky Sall ki te vizite La Mezon Blanch nan mwa mas 2013 la. Virewon lidè ameriken an sou kontinan afriken an ap dire yon semèn.
XS
SM
MD
LG