Accessibility links

Nouvèl Nèf sou Afè Eksplozyon Boston yo - Lapolis Arete 3 Lòt Moun

  • Kreyòl Sèvis Lavwadlamerik

Desen Tribinal ki montre 2 nan 3 nouvo akize yo, Dias Kadyrbayev (a goch) ak Azamat Tazhayakov (adwat), ki te konparèt devan jij federal Marianne Bowler nan Palè Jistis Moakley a nan Boston (1e me 2013).
Ozetazini, otorite yo akize 3 jenn gason deske yo te ranje kò yo pou yo bloke travay lajistis nan ankèt lapolis ap mennen sou eksplozyon bonm ki te deraye maraton vil Boston an.

Mèkredi premye me 2013 la, lapolis poze arestasyon 2 sitwayen peyi Kazakstan ak yon ameriken ki te frekante menm inivèsite avèk swadizan bonbis Dzokhar Tsarnaev –swa University of Massachusetts. 3 mesye yo tonbe anba akizasyon deske yo te ede Tsarnaev aprè eksplozyon bonm marasa ki te fèt nan dat 15 avril 2013 la e ki te touye 3 moun, tandiske plis pase 200 lòt te blese.

2 sitwayen kazak yo, Dias Kadyrbayev ak Azamat Tazhayakov, pa ekzèse dwa yo genyen pou yo te jwenn libète sou kosyon, e yo pral rete nan prizon jiska konparèt nan tribinal. 3èm sispèk la se yon sitwayen ameriken ki rele Robel Phillipos; misye twouve l anba men otorite yo avan li konparèt devan yon jij.

Anketè federal yo akize Robel Phillipos deske li te patisipe nan konplo pou detwi yon òdinatè pòtab ak yon valiz lekòl ki te gen fe datifis la e ki te pwopriyete Dzokhar Tsarnaev. 3 akize yo ka fè fas a yon tou prizon manch long e peye yon gwo amann si lajistis amerikèn jwenn yo koupab.
XS
SM
MD
LG