Accessibility links

Boston: Lapolis Anonse Youn Nan Sispèk Nan Atanta Boston Lendi yo Mouri. 2èm Nan Ap Chèche Pran Rak.


Lapolis zam nan men k ap chèche yon sispèk--sispèk nimewo 2 a-- nan atanta Boston yo. 19 avril 2013 nan Watertown, Eta Massachusetts.
Lapolis nan Eta Massachusetts, rejyon nò-ès Etazini, anonse youn nan sispèk nan eksplozyon Marathon Boston yo mouri e yon lòt ap chèche kraze-rak nan moman ajan polis yo lage koukouwouj dèyè li nan katye alantou vil Boston yo.

Otorite yo di eleman yo te idantifye ak yon kepi blan nan tèt li sou videyo kamera sekirite anrejistre sou sèn atanta a jou eksplozyon yo--ke yo idantifye kòm sispèk nimewo 2--nan mawon e yo konsidere li kòm "ame e danjere".

Lapolis envite rezidan yo nan Watertown yo rete andedan lakay yo, pa pran lari e mande yo pa louvri pòt yo bay pèson si yo tande frape nan pòt yo---eksepte si se yon ajan polis. Selon sa ajans nouvèl yo rapòte 2 sispèk yo se 2 frè e yo se moun Repiblik Tchétchénie, yon repiblik nan Larisi. E ke yo sòti nan rejyon Kokaz tchetchennyen an.


Fiziyad Sou Campus MIT a

Yon jij lokal konfime 2 nan sispèk yo te blese e touye yon ajan polis sou Campus Massachusetts Institute Of Technology a anvan l te vòlè yon otomobil e pran direksyon Watertown. Otorite yo di sispèk yo te voye eksplozif nan direksyon polisye yo pandan fòs sekirite tap pouswiv yo nan Watertown.

Pa gen presizyon sou kòman lapolis te rive arete sispèk nimewo 1 an--sila moun wè ak yon kaskèt bezbòl nwa nan tèt li sou foto FBI pibliye mèkredi 18 avril la. Otorite yo di misye te blese grav nan yon boukantay kout zam ak lapolis e li desede lopital kote yo te kouri avè l pou l al resevwa swen.

Responsab yo nan "Beth Israel Hospital" nan rejyon ensidan sa a ap dewoule a di sispèk la---yon gason adilt---te deja gen kè l rete lè li rive lopital la e l te genyen plizyè twou bal ak blese nan kò li ki fè kwè li te genyen eksplozif sou li tou.
XS
SM
MD
LG