Accessibility links

Ayiti - Eleksyon: Demach ap Kontinye pou Relanse Pwosesis la

  • Ekip Sèvis Kreyòl VOA

Negosyasyon ak demach ap kontinye nan palman an nan nivo komisyon bi-kameral ki la pou chwazi 3 reprezantan pouvwa lejislatif la nan Kolèj Tranzitwa Konsèy Elektoral Pèmanan an (CT-CEP).

Pandansetan, reyinyon ap fèt ak medyasyon platfòm « Relijyon pou Lapè a » sou dosye 6 manm Konsèy Pouvwa Judisyè a (CSPJ).

Sou dosye sa a, prezidan Chanm Bas la, Depite Jean Tolbert Alexis, di li pataje lide ki vle pou 3 premye manm yo te chwazi pou reprezante CSPJ a nan kolèj elektoral la (chwa ki te pwovoke gwo kontestasyon) bay demisyon yo kòm solisyon pou kriz la.

Nouvèl yo fè konnen pati konsène yo gen plan pou yo fè plis rankont sou dosye a, apre chati-tande prezidan Michel Martelly te fè ak ofisyèl CSPJ yo nan jounen madi 26 fevriye 2013 la.

Blokaj sa a nan nivo pwosesis elektoral la pwovoke kè-sote nan mitan manm Konferans Episkopal d Ayiti a kote Monsiyè Chibli Langlois, prezidan konferans la, lanse apèl bay aktè politik yo pou l mande yo prese jwenn yon solisyon pou kriz la.

Klike sou ikon ki agoch la pou w koute yon korespondans Rotchild Francois Junior depi Pòtoprens .
XS
SM
MD
LG