Accessibility links

Etazini/Eleksyon : Premye Deba ant 2 Kandida nan Kous Prezidansyèl la

  • Ekip Sèvis Kreyòl VOA

Ozetazini, 2 kandida a la prezidans yo, Prezidan Barack Obama (yon demokrat) ak kandida Pati Repibliken an, Mitt Romney, pral toke kòn yo mèkredi swa nan vil Denver, nan Eta Colorado, nan premye sou 3 deba yo gen pou yo fè anvan eleksyon prezidansyèl la ki fikse pou 6 novanm pwochen.

Tèm yo pral kouvri nan deba sa a se, antwòt, ekonomi, swen sante ak wòl gouvènman an. Daprè yon sondaj ki fèt nan Enstiti Rechèch Inivèsite Quinnipiac, Misye Obama genyen yon avans 4 pwen sou rival li a sou plan nasyonal la. Sondaj la bay Prezidan Obama yon avans 49 kont 45 sou Mitt Romney. Peter Brown, prezidan enstiti rechèch la, fè konnen se fanm yo plis ki bay prezidan an avantaj sa a. Misye Brown di:

“Obama gen yon avantaj 18 pwen pami elektris ki dispoze ale vote yo, tandiske Romney genyen yon avans 10 pwen pami gason ki enskri e ki dispoze vote yo. Pou kòmanse, sa k fè sa bon pou prezidan an, sè ke genyen plis fanm ki dizpoze al vote pase gason; egal, se medam yo an jeneral ki bay prezidan an avans la; li gen yon popilarite ki byen chita pami elektris yo.”

Daprè Misye Brown toujou, nan moman moun ap tann premye deba ant 2 kandida yo avèk enpasyans, konsèy li ta bay Romney, se pou misye fè yon jan pou l make kèk bon pwen nan premye deba sa a si l vle relanse kanpay li a e ogmante chans pou l redui eka ki separe l ak Prezidan Obama a. Nap site Misye Brown ankò:

“Li klè ke Prezidan an devan. Alòs, misye pa bezwen anyen nan deba sa a. Se pou l fè yon fason pou anyen pa rive ki ta kapab chanje sitiyasyon aktyèl la. Kanta pou Romney, misye dwe chache chanje done yo. Si deba a fini egzeko, se yon viktwa pou Obama. Alòs, Romney fèt pou l chache pran tèt elektè ki pa dispoze vote pou li yo, yon fason pou yo chanje lide epi deside al vote pou li."

Gen 3 lòt deba sou pwogram kanpay elektoral 2 pati yo:
-11 Oktòb: deba ant Vis Prezidan Joe Biden ak rival repibliken n nan, Depite Paul Ryan; deba sa a pral dewoule nan vil Danville, Eta Kentucky;
-16 oktòb: deba ant 2 kadida a la prezidans yo, Barack Obama ak Mitt Romney, nan vil Hempstead, nan Eta New York. Tèm nan se: politik nasyonal ak entènasyonal Lèzetazini;
-epi 22 oktòb: deba ant Barack Obama ak Mitt Romney nan vil Boca Raton, Eta Florid. Tèm 2 kandida yo pral debat se politik entènasyonal Lèzetazini.
XS
SM
MD
LG