Accessibility links

Breaking News

Etazini-Eleksyon: Konvansyon Pati Demokrat la ap Kòmanse Madi nan Charlotte, Kawolin di Nò


Prezidan Barack Obama pandan li tap mennen kanpay nan Charlottesville, Eta Virginia.
Ozetazini, Prezidan Barack Obama ak patizan n yo ap tire kout boulèt wouj sou kandadi Pati Repibliken an, Mitt Romney, avèk espwa yo ka ralanti misye sou bon jan wou lib, bon bourad kanpay li a pran aprè dewoulman konvansyon pati l la semèn pase a, e nan moman Pati Demokrat la ap pare pou l kòmanse konvansyon pa l la semèn sa a.

Depi wikenn nan patizan prezidan Obama yo kòmanse vide sou vil Charlotte, nan Eta Kawolin di Nò, kote konvansyon pati a pral dewoule-a. Kanta pou prezidan ameriken an, depi kèk jou deja lap mennen kanpay pou l chofe baz pati a. Dimanch 2 septanm 2012 la, pa egzanp, li te nan Eta Kolorado, nan pati lwès Lèzetazini, kote li fè kèk kòmantè sou konvansyon Pati Repibliken an te òganize nan vil Tampa, nan Eta Florid. Lè kèk patizan te kòmanse fè bri. kòmkwa yo te vle rele chalbari dèyè Repibliken yo, Misye Obama te prese pale pou l di yo:

« Non, non; pa rete ap rele chalbari dèyè yo ; se vote pou n al vote … »

Prezidan Obama pat ezite pase alatak. Li lonje dwèt sou Misye Romney ak Repibliken yo pou l di yo pa genyen okenn pwogram nouvo pou yo ofri pèp ameriken an –okenn pwogram, pa ekzanp, pou yo ede ekonomi an rekanpe sou 2 pye l. Li fè konnen -nap site :

“ Lide yo prezante yo, pap bay bon rezilta…. Yo pat bay rezilta nan le pase, yo pap bay rezilta jounen jodiya.”

Kantapou Mitt Romney –ki pat sispann mennen kanpay depi li te fin aksepte nominasyon Pati Repibliken an nan konvansyon Florid la– dimanch sete yon jou san aktivite politik kote li te ale legliz ak madanm ni, anvan li kòmanse fè preparasyon pou yon seri deba li pral fè ak Prezidan Obama. Sepandan, kèk nan èd-de-kan kanpay li a --tankou Ted Kanavas, ki se prezidan Pati Repibliken an pou chapit Eta Wisconsin nan- mesaj kandida pati a pote pou elektè yo, jwenn bon resepsyon pami majorite sitwayen ki pral vote yo. Misye Kanavas di –nap site tou :

«Kilès ki genyen yon pi bon plan pou fè n ale de lavan? Yon vrè plan ki konkrè, ki kapab fè nou di : << Wi, se sa n dwe fè pou n pèmèt peyi sa a fè pwogrè ankò? >> Moun sa a, se nouvo prezidan nou pral eli a, se Mitt Romney… »

Daprè yon sondaj dopinyon ajans nouvèl Reuters pibliye dimanch la, Prezidan Obama ak Mitt Romney twouve yo nan yon kous trè sere kote yo pat pou pat nan entansyon-d-vòt yo. Si eleksyon an tap dewoule Jodi a, chak kandida tap jwenn 45 pou san vwa elektè ameriken yo.
XS
SM
MD
LG