Accessibility links

Breaking News

Dosye Refijye Siryen nan peyi Vwazen Devan Konsèy Sekirite l ONU an


Se pa bann e pa pakèt refijye Siryen kontinye debake sou tèritwa peyi vwazen yo tankou Tiki, pa egzanp. Se konsa, nan moman plis pase 220 mil sitwayen siryen ap viv kay vwazen, otorite peyi sa yo fè Konsèy Sekirite Nasyon Zini konnen yo bezwen asistans entènasyonal pou yo kapab fè fas ak sa yo konsidere kòm yon trajedi kap vin pi konplike chak jou.

Nan Tiki, kantite a deja rive nan nivo 80 mil konsa. Jedi 30 out 2012 la, minis afè etranjè tik la, Ahmet Davutoglu, ki te pran lapawòl devan Konsèy Sekirite a, di peyi li pap kapab resevwa plis ke 20 mil lòt refijye ankò --yon kantite ki ka debake nan peyi li anvan lontan, selon chif yap anrejistre chak jou depi kèk semèn.

Minis Davutoglu di :

"Daprè chif Biwo Nasyon Zini pou Kowòdinasyon Afè Imanitè bay, genyen plis pase 2 milyon moun ki kite kote yo t ap viv anndan peyi Siri. Devan yon dezas imanitè konsa, l’ONU ta dwe kòmanse tabli kan pou deplase sa yo anndan Siri menm e se pou l ta fè sa san pèdi tan. Mwen pa bezwen di si kan sa yo ta dwe genyen yon pwoteksyon total."

Nan menm seyans ki dewoule jedi a nan Konsèy Sekirite l’ONU an, minis afè etranjè jòdanyen an, Nasser Joude, fè konnen pandan 4 jou ki pase yo sèlman, anviwon 12 mil siryen travèse fwontyè pou yo antre sou tèritwa jòdanyen an -sa ki fè total refijye siryen ki twouve yo nan peyi li jounen jodi a, monte depase 72 mil moun.

Daprè chif l ONU bay, kantite refijye siryen ki nan peyi Liban, monte rive 60 mil; tandiske nan Irak –yon peyi kap fè pwòp tranzisyon pa l pou l sòti nan yon konfli e tabli estabilite lakay li- chif la depase 18 mil.
XS
SM
MD
LG