Accessibility links

Kandida Repibliken Alaprezidans Mitt Romney Chwazi Paul Ryan, Prezidan Komisyon Bidjè Chanm Depite Etazini an, Kòm Kandida Pou Pòs Visprezidan an

  • Jacques Jean-Baptiste

Agoch, kandida alaprezidans Pati Repibliken an, Mitt Romney ak prezidan Komisyon Bidjè Chanm Depite Etazini an, Paul Ryan.

Kandida alaprezidans Pati Repibliken an, Mitt Romney, anonse samdi li chwazi Depite Eta Wisconsin nan, Paul Ryan, kòm kandida alavisprezidans sou tikè repibliken pou eleksyon jeneral 6 novanm 2012 yo.

Anons lan tonbe vè 7 tè di maten samdi, lè Washington, so yon sit mobil kanpay misye Romney a kreye nan kòmansman mwa a (Mitt's VP), men se a 9 vè dimaten 2 kandida yo parèt nan televizyon pou anonse nouvèl la ofisyèlman.

Paul Ryan, 42 zan, se yon konsèvatè k ap dirije Komisyon ki pi pisan nan Chanm Depite a, Komisyon Bidjè a. Yo konsidere l nan Washington kòm lidè entelektyèl Pati Repibliken an e youn nan manm pi enfliyan pati konsèvatè a.

Nan koumansman ane a, misye Ryan te pwopoze yon bidjè "sentre bas depans " pou montre kòman, si se te Repibliken ki te sou pouvwa a nan Mezon Blanch la, yo ta pra l fè gouvènman an mache. Analis politik yo di se konsèvatè yo ki pouse Mitt Romney fè chwa misye Ryan nan--yon chwa ki va ede l bat prezidan sòtan an, Barack Obama ak Joe Biden nan eleksyon novanm 2012 la.

Sepandan, sèten espesyalis ekonomik di pwogram fiskal ak pwogram bidjetè Paul Ryan nan se yon "dynamit politik" Romney vin mete nan kanpay li. Dapre Alan Abramowitz, pwofesè syans politik nan Inivèsite Emory: "Romney bezwen rale-mennen-vini sou li elektè k ap balanse ant Pati Repibliken ak Pati Demokrat la (endepandan yo), men mwen pa panse Paul Ryan pra l ede l nan sans sa a".

Kanpay misye Romney, dapre chèn televizyon ameriken ABC, enfòme depi yè swa yon seri pèsonalite, tankou ansyen Gouvènè Minnesota Tim Pawlenty, Senatè Ohia Rob Portman ak Senatè Florid Marco Rubio (non yo ap site kòm posib kolistye misye Romney nan kous pou Mezon Blanch lan) ke se pa yo ansyen Gouvènè Eta Massachusetts la chwazi kòm kandida alavisprezidans.

Men, nan moman misye Romney t ap prezante misye Ryan samdi maten devan nasyon an, bouch li chape e li entwodui kandida alavisprezidans lan kòm pwochen "Prezidan Lèzetazini"--yon erè li te kouri vit korije.

Apre anons chwa visprezidan li an, misye Romney pral pran "la route" pou yon "bus tour" ki va mennen li nan 4 jou nan 4 Eta ki ka deside eleksyon ane sa a -- 4 Eta kandida Barack Obama te ranpòte nan skriten 2008 la. Eta sa yo se: Virginia, Kawolyn Di Nò, Florid ak Ohio.

XS
SM
MD
LG