Accessibility links

Konferans pou Laprès Premye Minis Lamothe ak Sekretè Deta Clinton

  • Ekip Sèvis Kreyòl VOA

Premye minis ayisyen an, Laurent Lamothe, twouve l Ozetazini depi lendi 23 jiyè 2012 la pou yon vizit 2 jou kote li deja rankontre nanmian jounen madi a avèk Sekretè Deta ameriken an, Hillary Clinton, nan Depatman Deta a.

Nan yon konferans pou laprès 2 ofisyèl yo bay aprè yo te fin fè yon chita-tande, yo pale de eta aktyèl rapò ki egziaste ant Lèzetazini ak Ayiti epi yo abòde efò k ap fèt pou pote chanjman pozitif nan lavi pèp aysen an.

Madam Clinton deklare antwot:

"Tankou mwen di Premye Minis la e tankou mwen di sa plizyè fwa deja, Ayisyen se youn pami pèp ki pi kreyatif, ki pi valab e ki travay pi di nan lemond. Nou benefisye anpil-anpil de travay ak reyalizasyon Ayisyen-ameriken ki nan peyi nou an, menm jan anpil lòt peyi benefisye de travay yo tou.

Nou trè-trè kontan devan pwogrè nou reyalize deja; nou byen konnen genyen gwo defi devan nou; pandan nap fè fas ak defi sa yo, nou espere yon avni kote tout ayisyen va kapab reyalize potansyèl ke Bondye ba yo, pandan yo va rete nan peyi kote yo te fèt la, nan peyi yo renmen an."

Deklarasyon Chèf diplomasi amerikèn nan, Hillary Clinton, pandan li t ap bay yon konferans pou laprès nan Depatman Deta a ansanm avèk chèf gouvènman ayisyen an, Laurent Lamothe.

Misye Lamothe te pran lapawòl tou pou l pale de apresyasyon pèsonèl li pou tip de relasyon ki egziste jounen jodi a ant Washington ak Pòtoprens, sitou nan moman 2 peyi yo fèk make 150èm anivèsè etablisman ofisyèl rapò sa yo.

Premye Minis Lamothe di:

"Biwo mwen, biwo Premye-Minis la ak Prezidan an, santi bon jan santiman devan apresyasyon ak respè ou bay ayisyen. Se yon bagay ki trè zenpòtan pou nou : Respè nou jwenn nan men ou-menm, pèsonèlman, e nan men gouvènman ameriken an, gen anpil efè sou relasyon nou, sitou nan moman nou fèk selebre 150 tan rapò diplomatik nou ki la depi epòk kote Prezidan Abraham Lincoln te rekonèt endepandans Ayiti. Nan dat 12 jiyè pase a, nou selebre 150èm anivèsè relasyon sa yo; e nou trè kontan e trè fyèr de sa."
XS
SM
MD
LG