Accessibility links

Washington Toujou Kont Pwogram Nikleyè Iranyen an

  • Ekip Sèvis Kreyòl VOA

Sekretè deta amerikèn nan, Hillary Clinton, di Lèzetazini dispoze itilize tout sa li genyen kòm pwisans pou li anpeche Iran fabrike yon zam nikleyè.

Chèf diplomasi amerikèn nan, ki t ap ablòde dosye a lendi 16 jiyè 2012 la aprè li te fin fè chita-tande avèk gwo otorite izrayelyen yo nan Jerisalèm, fè konnen pwopozisyon Iran fè sou kesyon an jiskaprezan, se pa pwopozisyon ki reyalis.

Madam Clinton deklare:
"Nou tout ta prefere yon solisyon diplomatik; dayè lidè iranyen yo toujou gen yon chans pou yo pran bon desizyon an. Solisyon an se chwa Iran sèlman li ye."

Lèzetazini, Izrayèl ak yon kantite peyi ewopeyen sispèk Iran ap travay pou l devlope zam nikleyè.

Iran demanti pawòl sa a ; li di operasyon anrichisman iranyòm k ap fèt lakay li a, se pou devlope enèji pou itilizasyon sivil ak rechèch medikal.

Sekretè Deta Clinton retounen Washington byen bonè madi; konsa li mete fen nan yon virewon 2 semèn ki te mennen li nan 9 peyi ann Ewòp, ann Azi e nan Mwayen Oryan an.
XS
SM
MD
LG