Accessibility links

O Meksik, avèk Eleksyon Enrique Pen̈a Nieto, PRI Retounen sou Pouvwa a


Eleksyon o Meksik: Enrique Pena Nieto, kandida Pati Revolisyonè Enstitisyonèl la (PRI) avèk madanm li, Angelica Rivera
O Meksik, rezilta preliminè eleksyon prezidansyèl ki dewoule dimanch pemye jiyè 2012 la montre pèp la deside remete PRI (Pati Revolisyonè Enstitisyonèl la) sou pouvwa a avèk viktwa li bay kandida pati sa a, Enrique Peǹa Nieto. Responsab komisyon electoral la –ki pran lapawol byen ta dimanch swa- fè konnen misye Peǹa Nieto jwenn 38 pousan vwa yo, e konsa li ranpòte lavikwta sou ansyen majistra kominal vil Meksiko a, Andrés Manuel Lòpez Obrador, kandida PRD a (Pati Revolisyonè Demokratik la) ki ranpòte 31 pou san vwa yo. Anvan sware a te fini, Misye Pen̈a Nieto te pale ak yon foul patizan ki te reyini pou koute li. Kandida Pati Revolisyonè Enstitisyonèl la deklare –nap site:
“Pandan mwen plen ak emosyon, se avèk yon sans konpwomi, yon sans responsablite mwen aksepte manda sitwayen meksiken yo ban mwen jounen jodi a. Pandan 3 mwa ki pase yo, nou menm, òm politik ak kandida, se chak nou nou te pran lapawòl. Jodi premye jiyè 2012 la, se pèp la ki pale. »
Pati Misye Pena Nieto a (Pati Revolisyonè Enstitusyonèl la) te dirije Meksik pandan 71 zan jiskaske li te pèdi pouvwa a an l an 2 mil. Nan eleksyon prezidansyèl ki te dewoule nan ane nou site a, votan meksiken yo, ki te fatige ak koripsyon e ak koken elektoral, te eli Vicente Fox, kandida PAN (Pati Aksyon Nasyonal la) kòm prezidan meksiken. An 2006, pèp la ta pral eli Felipe Calderòn, yon lòt kandida Pati Aksyon Nasyonal la, pou ranplase Misye Fox ; men sou manda Calderon nan ekonomi meksikèn nan te gen pou travèse gwo difikilte kote gouvènman an depanse anpil kòb epi li te anplwaye anpil enèji ak manm pèsonèl lame ak lapolis pou konbat vyolans ki makònen ak trafik dwòg.
Aprè anons komisyon elektoral la fè pou di Misye Peǹa Nieto ap mennen avèk 38 pousan vwa yo, kandida Pati Revolisyonè Demokratik la, Lopez Obrador --ki te pèdi devan Felipe Calderòn ak yon maj tou piti an 2006-- pale ak patizan l yo pou l fè yo konnen lap rete tann responsab elektoral yo fin konte tout vwa yo anvan pou l aksepte defèt li. Misye Obrador deklare:
”Nou dwe reprezante sitwayen meksiken yo jan yo merite pou nou reprezante yo. Yo gen konfyans nan nou. Nou pap janmen aji yon fason irresponsab; nap rete tann tout enfòmasyon yo. E lè lè a va rive, nou va fè pèp meksiken an konnen rezilta eleksyon sa a. »
Kandida Pati Aksyon Nasyonal la (PAN), Josefina Vazquez Mota, fini kous la an 3èm pozisyon.
XS
SM
MD
LG