Accessibility links

Kou Siprèm Lèzetazini an Apiye Plan Refòm Prezidan Obama Pou Sistèm Swen Sante a

  • Ekip Sèvis Kreyòl VOA

Kou Siprèm Lèzetazini an --pi gwo tribinal peyi a-- fè Prezidan Barack Obama yon gwo kado jedi 28 jen 2012 la, avèk desizyon majorite jij yo pran pou yo apiye yon plan administrasyon an genyen pou l pote refòm nan sistèm swen sante ameriken an. Vòt tribinal la se 5 « wi » kont 4 « non ». Daprè plan an, apati de ane 2014, tout ameriken dwe achte asirans sante oubyen yap genyen pou yo peye amand.

Prezidan Kou Siprèm nan, John Roberts, mete ansanm avèk jij ki pi liberal nan tribinal la pou l pèmèt plan an jwenn apui Kou Siprèm nan. Misye Robert ekri pou l di: "Puiske konstitisyon an prevwa pou tout sitwayen genyen swen-sante, se pa wòl tribinal la pou l bloke yon plan ki reklame sa, ni pou l pase pyès lwa ki ta pale de sajès oubyen ekite yon plan konsa."

Jij Stephen Breyer, Ruth Bader Ginsberg, Elena Kagan ak Sonia Sotomayor vote nan menm sans ak Mèt Roberts pou yo apiye lejislasyon an. Daprè sa gouvènman Obama a di kòm rezon-dèt plan refòm nan, konstitisyon amerikèn nan apiye obligasyon pou moun genyen asirans sante a, paske tout sitwayen ameriken ap bezwen swen-sante nan yon moman oubyen yon lòt nan vi yo, epi pratikman pa gen anyen ki ka ranplase asirans sante.

26 eta ameriken te deja ale nan tribinal pou yo denonse lwa sou refòm nan swen-sante a, paske, daprè otorite kap dirije eta sa yo, Leta pa kapab oblije moun achte asirans sante, yon pwodui yo kapab pa ni vle, ni bezwen. Se konsa tou, lwa sou refòm nan tounen youn nan kesyon ki plis chofe nan kanpay prezidansyèl ane 2012 la.

Kandida Pati Repibliken an ki pral fè fas ak Prezidan Obama nan eleksyon novanm nan, Mitt Romney, deja pran angajman pou l elimine lwa sa a si se ki rapòte prezidans la.
XS
SM
MD
LG