Ozetazini, yon jij federal nan eta Kentucky, nan sant peyi a, pase lòd pou yon grefye ale nan prizon pou sa yo rele nan langaj jiridik la "Injure à la cour", sètadi « mank dega pou yon tribinal » oubyen "mepri pou lajistis", paske li refize obeyi lòd pou l bay yon koup omoseksyèl yon ak de maryaj.
Grefye vil Rowan, Madam Kim Davis, defye yon desizyon Kou Siprèm Lezetazuni te adopte lè li te derefize siyen sètifika pre-maryaj pou omoseksyèl yo; paske, daprè li, sa ta vyole kwayans li kòm yon fidèl Legliz de Dye. Men Jij David Bunning di, an tan ke yon otorite ki la pou aplike e fè aplike tout lwa ki an vigè sou tout tèritwa ameriken an (san bliye lwa Kou Siprèm nan te vote, nan dat 26 jen 2015 la, pou l rekonèt maryaj omoseksyèl la), li pa gen lòt chwa eksepte mete madanm nan prizon; paske, si li fè Madam Davis peye yon amand tou senpleman, sa pa pral fè li chanje konpòtman.
Akoz refi grefye a pou l siyen ak maryaj pou 2 fi oubyen 2 gason, tout travay te bloke nan tribinal la pandan plizyè jou. Sepandan blokis sa a leve avèk desizyon 5 asistan Madam Davis pran pou yo aplike lalwa, sètadi siyen ak maryaj pou tout moun kèlkeswa oryantasyon seksyèl yo.