Prezidan FIFA (Federasyon Entènasyonal Foutbòl Asosyasyon), Sepp Blatter, lanse yon apèl pou l mande linite pami manm òganizasyon an e li pwomèt pou l travay sou skandal koripsyon ki pete nan mitan federasyon an si li re-eli vandredi 29 mai 2015 la nan tèt federasyon an.
Mesye Blatter pran lapawòl nan okazyon 65e kongrè anyèl FIFA-a kap dewoule nan vil Zirik, nan peyi Lasuis, kote manm yo ap pare pou yo vote e deside si wi ou non yap ba prezidan sòtan an yon lòt manda. Prens Ali bin al-Hussein, moun peyi Jòdani, se sèl advèsè li nan kous la.
Sepp Blatter deklare arestasyon 7 ofisyèl FIFA, mèkredi 27 me pase a, reprezante yon siklòn ; men li lanse yon apèl pou l mande linite ak yon espri d’ekip pou FIFA kapab avanse. Jedi 29 me a, Misye Blatter te di FIFA gen pou l fè fas ak lòt move nouvèl.
2 asosyasyon foutbòl te mande prezidan FIFA a bay demisyon n anvan Kongrè a . Pa egzanp, foutbolè lejandè fransè e prezidan UEFA a, Michel Platini, mande Misye Blatter kareman pou l kite pòs la. Depatman Jistis ameriken an te anonse, nan jounen mèkredi a, li akize ofisyèlman 14 manm FIFA dèske yo komèt fwod ak magouy ki sòti nan kout-lajan anba tab pou rive nan lavaj lajan, an pasan pa itilizasyon ilegal kominikasyon elektwonik.