Yon nòt ki sòti nan biwo kominikasyon prezidans la ann Ayiti fè konnen Prezidan Michel Martelly ale nan peyi Trinidad pou l patisipe nan yon somè CARICOM-JAPON kap dewoule Jodi lendi 28 jiyè 2014-la.
Misye Martelly, ki genyen avèk li minis komès ak endistri a, Wilson Laleau, pral rankontre avèk Premye Minis Trinidad la, Madam Kamla Persad-Bissessar, e ak Premye Minis japonè a, Shinzo Abe.
Madi 29 jiyè 2014 la, prezidan ayisyen an prale Bahamas kote li pral fè chita-tande avèk premye minis zile a, Perry Christie, yon fason pou l ranfòse, amonize e dinamize rapò ki egziste ant Ayiti ak Bahamas. Pandan rankont Martelly-Christie a, 2 lidè yo pral fè diskisyon kap debouche sou siyati akò sa yo :
Akò-kad kowoperasyon ;
Akò kowoperasyon teknik ak syantifik sou ranfòsman kapasite enstitisyon pòtyè yo ;
Akò kowoperasyon komèsyal ak teknik nan domèn kontwòl kalite pwodui agrikòl ak pèch ekspòtab yo ;
Akò sou pwomosyon ak pwodiksyon resipwòk envestisman.
Prezidan Martelly ap retounen Ayiti madi apremidi.