vandredi 24 oktòb 2014, 21:25 EDT

Nouvèl / Lèzetazini

Fiziyad nan Eta Connecticut: 20 Timoun Mouri

x
Ekip Sèvis Kreyòl VOA
Prezidan Barack Obama deklare li menm ak paran atravè peyi a santi gwo lapenn devan fiziyad an mass ki fèt nan yon lekòl jodi vandredi a kote 20 timoun ak 6 granmoun pèdi lavi yo nan Eta Connecticut, nan rejyon nò-ès Lèzetazini.

Misye Obama ke moun te kapab wè kouman figi li kontrarye te pale ak dlo nan je pandan li te pran lapawòl apre midi-a nan Mezon Blanch lan. Lidè ameriken an di pifò viktim yo se timoun ki te plen lavi devan yo.
 
Li di: "Nou andire twòp trajedi nan kèk ane ki pase yo e chak fwa mwen aprann nouvèl sa yo, mwen reyaji pa antanke prezidan men tankou tout kretyen-vivan---tankou paran  e se espesyalman vre jodi a. Mwen konnen pa genyen yon paran Ozetazini ki pa santi kokenn chèn lapenn mwen santi a. Majorite moun ki mouri jodi a se timoun, bèl ti lèzanj ant 5 e 10 zan. Yo te genyen tout lavi a devan yo : anivèsè nesan, seremoni graduasyon, maryaj epi yon jou genyen pitit pa yo tou. Pami sila ki tonbe yo genyen tou pwosfesè, gason ak fi ki te konsakre vi yo ap ede timoun nou-yo reyalize rèv yo"

Prezidan Obama kalifye fiziyad la kòm yon “krim rayisab". Li di peyi Etazini andire twòp trajedi konsa nan ane ki sòt pase yo e ke peyi a pral pote-kole ansanm e pran bon jan aksyon pou prevni kalte ensidan sa yo.

Misye Obama mande pou yo monte « demi ma » drapo ki sou tèt palè nasyonal la  ak sou tèt lòt biwo piblik yo pou jouk madi kap vini an  kòm siy « dèy ».

Gouvènè Connecticut la, Dannel Malloy, kalifye trajedi lekòl la yon zak « endeskriptib ».

Nouvèl yo fè konnen se yon eleman ki nan ventèn li e ki rele Adam Lanza ki komèt zak sa a. Toujou dapre nouvèl yo manman li, ki te travay nan lekòl la, mouri tout nan atak la.

Prezidan Obama pale ak gouvènè Malloy e li di li kouman li tris devan trajedi a e prezidan an pran angajman pou’l  mete resous gouvènman federal la aladispozisyon misye Malloy.
Fowòm sa a fèmen
Kòmantè
     
Poko gen kòmantè sou fowòm nan. Si ou vle, ou ka tounen premye moun ki kòmante sou li.

Swiv nou sou rezo sosyal yo