Yon moun teste pozitif pou viris Ebola a nan nò Repiblik Demokratik Kongo pandan plizyè lòt moun tonbe malad, e ta gen nan yo ki menm mouri anba sentom ki ta sanble ak epidemi an.
Yon pòtpawòl Òganizasyon Mondyal Lasante (OMS) fè konnen otorite yo deklare yon ijans pou epidemi Ebola a nan pwovens Bas-Uele apre tès laboratwa fin konfime prezans viris la.
Pòtpawòl la mOMS la, Christian Lindmeier, di Sèvis Angle pou Afrik Lavwadlamerik la, 9 moun nan zòn nan tonbe malad ak sa ke espesyalis yo klase kòm yon fyèv ki vini ak emoraji kote pasyan an pèdi anpil san. Li fè konnen 3 moun pèdi lavi yo ak maladi a.
OMS fè konnen sou kont Twitter li lap travay ak Ministè Sante Kongo a pou bare epidemi a.