Sekretè jeneral Nasyon Zini an, Ban Ki-moon, mande pèp ayisiyen an padon poutèt ravaj epidemi kolera a koze nan peyi d Ayiti. Nan yon mesaj Misye Ban te anrejistre an kreyòl, fransè ak anglè e ki pase sou radyo nan jounen jedi premye desanm 2016 la, li di li regrèt anpil Nasyon Zini pat fè ase efò pou l konbat epidemi an lè li te fèk eklate nan peyi a. Sekretè Jeneral la pwomèt òganizasyon mondyal la pral ede pèp ayisyen an konbat kolera.
Chèf Nasyon Zini an di òganizasyon an ap travay sou yon plan a 2 volè pou elimine epidemi kolera ann Ayiti e anvan lontan li pral mete plan sa a devan Asanble Jeneral la.
Mèt Brian Concannon se youn nan avoka kap defann viktim kolera yo ann Ayiti. Misye Concannon, ki baze nan vil Boston, nan Eta Massachusetts, se direktè egzekitif Ensiti pou Jistis ak Demokasyi ann Ayiti. Nan yon entèvyou ak Lavwadlamerik, Mèt Concannon di li satisfè ak deklarasyon Misye Ban Kimoon nan; daprè li, se yon pa istorik ann avan, menmsi kèk aspè deklarasyon an reprezante yon desepsyon pou militan kap defann viktim kolera yo.
Klike sou 2 lyen anlè yo pou w tande deklarasyon Misye Ban ak reyaksyon Avoka Concannon.