Nasyon Zini fè konnen preske pa gen tan ki rete ankò pou ede 275 mil abitan nan lès vil Alèp, nan nò peyi Siri, paske yo prèske pran pàn manje. L ONU avèti moun pwal mouri ak grangou si konvwa èd pa ka antre nan vil la nan jou k ap vini yo.
Sa gen plizyè jou depi dènye manje Pwogram Alimantè Mondyal (PAM) te pote nan zòn nan te rive jwenn moun ki bloke nan pati lès Alèp. Kounye a anyen pa rete. Plizyè demand ke Nasyon Zini te fè pou l voye konvwa èd nan vil la, te jwenn ak refi youn oubyen tou le 2 pati k ap goumen yo.
Konseye Espesyal pou Anvwaye Espesyal l ONU nan Siri, Jan Egeland, fè konnen li espere Larisi ap bay yon konfimasyon ekri e ke l ap jwenn yon repons pozitif gouvènman Siri a pou rapouswiv operasyon sa a ki konplike anpil e ki danjre.